當語言失落，如何說出愛？《我的鴉鵲公主》是一部關於親情、自由與記憶的動人小說。以濃烈的客語筆觸，描繪聾人少女廖芮潔「阿惜」與姪子兼保鑣廖秉剛「餅仔」青梅竹馬的成長故事，也映照出時代變遷下個人與家族的命運糾葛。鬼聲、咖哩、手語與難以歸類的愛情交織，讓人看見一段故事如何與你我身邊的人們一起成長與老去。當語言失落，仰般講出愛？《我的鴉鵲公主》係一部有關親情、自由摎記憶个動人小說。用醹烈个客語筆觸，描繪聾人少女廖芮潔「阿惜」摎姪仔也係保鑣廖秉剛「餅仔」青梅竹馬个成長故事，也映照出時代變遷下個人摎家族个命運糾葛。鬼聲、咖哩、手語摎難歸類个愛情交織，分人看著一段故事仰般摎你我脣頭个人共下成長摎老去。——【本書特色】★客委會「客語文學作家創作計畫」七位強檔作家聯袂創作★臺灣文學金典獎、金鼎獎、香港紅樓夢獎……金獎小說家甘耀明首部客語作品★全書以超過60％的客語文字書寫，並附上詳盡華語註解，讓讀者輕鬆閱讀客家文學。——【作者介紹】甘耀明目前專事寫作，小說出版《神秘列車》、《水鬼學校和失去媽媽的水獺》、《殺鬼》、《喪禮上的故事》、《邦查女孩》、《冬將軍來的夏天》、《成為真正的人》等，與李崇建合著《對話的力量》、《閱讀深動力》、《薩提爾的守護之心》等教育書。著作曾獲臺北國際書展大獎、聯合報文學大獎、臺灣文學獎長篇小說金典獎、金鼎獎、香港紅樓夢獎決審團獎/首獎、金石堂十大影響力好書獎、Openbook好書獎、開卷年度十大好書獎。——【內文試閱】第一章客廳的桁桷有鬼仔我屋家廳下的桁桷是「異時空」，成時傳來鬼叫。這是一間百過年、舊陋的老屋，戴在桁桷裡肚的鬼群講麼个話，底下的我們聽毋識。鬼仔非常狡怪，毋想摎我們溝通，單淨搣出怪叫，有成時像清風吹過竹林聲，有成時像老人家牙痛咬等頦腮緊呻，有成時像有人撞著碗櫥發出矻矻搉搉聲。我無辦法明細講出該兜聲哨，我恅著我聽著了，又往往發現它們怕是對我心肚傳來的敨大氣聲。鬼聲毋是輒輒有，下把仔擎頭看過去，正堵好「看」得出聲音—這是我姑姑講的，明白講來是她用手迎腳劃摎我溝通，她是聾人，教會我用目珠去看聲音—這毋使疑狐，聲響看得著，像雨毛仔在水面項停腳，水紋疊疊的聲響乜在你心肚停腳。該種鬼叫，毋單淨看得著，還會跌落來。無毋著，恁樣講遠了，我摎事情從頭講一到。客廳的屋瓦下，在魚鱗拶拶的瓦仔摎複雜交錯的扛梁結構中，膏著了當多條紅粄，該是用來黏緪鬼嘴，無愛分他們喤噦。紅粄毋使煎忒老，煎到牽絲盡堵好，在廳下大力攉往上，黏緪扛梁，分肚枵的鬼仔拿來食，他們毋是兩隻手亂串就是食到嘴脣擘毋開，暫時恬下來。該兜跏跏的紅粄看起來像字，變到是學習工具。我日本時代出世的阿公曾經指等該兜紅粄，教我講日文平假名拼音，這隻像あ，該隻像い；我當時坐在高高的、危險的大桁仔看該兜日本字，毋多知就企起來發誓，愛煞力牯保護姑姑，做她的保鑣，該年我三歲，是我一生人講出的盡大誓言。我讀小學時對跏跏的紅粄學著注音符號，尤其捲舌嫲的ㄓ、ㄔ、ㄕ是客話發音無的，學起來食力。國中時，我又對跏跏紅粄學了所有的英文，輒常搞差N同Z、M摎W，它們看起來是睡目的姿勢無共樣；G摎C兩隻字是舌嫲有抑是無的問題；小寫的h摎n是膨凳摎凳頭的差別。該兜紅粄拑久會㪐忒，跌在電視殼是尖尖聲，跌在神桌是沉沉聲，跌在哪儕的頭那頂就是零嗒，歡喜拿來食，紅啾啾的冷硬紅粄喫起來還保留好味緒，食到兩嘴角的筋頭出出。「這是鬼仔的嘴脣。」姑姑拿等紅粄條，放到嘴項噍。「你好勢了！」我摎兩手的手指拱拱，揬著共下，講：「現下，妳是摎鬼仔的嘴KISS了。」姑姑笑到燦爛，面頰卵的酒窟著著春風。歸家人驚鬼驚到無奈何的日仔，姑姑自由自在，無感受任何的困擾。見擺鬼聲對桁桷跌落來摝人，大家擎頭看，歸面無奈時，單淨姑姑繼續做她的事，她毋擎頭，猴形笑容走出出，還有是兩粒酒窟軟軟，親像她摎鬼仔是好朋友，從來毋驚。單單我知，鬼聲是姑姑故意笑出聲的。這間老屋是兩棧樓，我摎姑姑歇在棚，脣項就是客廳，打開細窗門，做得爬到廳下頂高的大桁仔，坐等看底下。客廳愛有嶄然高的空間感正派頭，這分我們兩儕好機會囥在頂高看等底下的情形。我掛保證，在日時頭，毋會發現頂高有人，他們講話、食茶抑是冤家，從來毋會注意頂背有人停動。在暗晡，有燈弇仔的電火打開來，光線單單照往下，桁桷空間漯到烏疏疏，還較看毋出頂高有人。在悠悠仔的歲月，我摎姑姑，我們兩儕坐兼兼，相搭肩頭，坐在該條有二十零公分粗蠻的龍骨桁仔，吊等兩隻腳，親像是坐在河壩的大石牯打水，看底下家族發生的故事。我們是古板合生趣的家族，我婆太是坐在廳下的雕像，阿公是永遠研究草藥的赤腳醫生，阿婆是有閒就唱歌的失敗歌星，幾儕叔伯又愛搞怪，坐在大桁仔看他們實在趣怪。教我們恁樣搞的是阿公，他乜當會刁琢人。我記得有一擺，我、姑姑、阿公在大桁仔項跍等，滿叔坐在廳下看電視。滿叔是自戀型，當愛照鏡仔，恅著面竵到二十三．六角度來看盡緣投，這是因為日頭來到北迴歸線二十三．五度就愛斡頭，他的英俊，比豪光燦爛的日頭多〇．一度。該擺他是看有名的港劇《楚留香》，主角楚留香是風流、緣投合武功高強的人，四周圍毋是嬌女，就是敵人。毋過，滿叔認為自家武功一擺打死二十隻烏蠅，嗄無分半儕西施中意，他的帥打爽了。故所他瞠著楚留香，火氣就猛了，罵加一下仔，實在像得著顛狗病的人，還假斯文樣仔用手掠頭那毛，用二十三．六度䁯等電視機裡的主角。楚留香置之不理，揇等美人，啉等美酒，秋波風流。緊用了少話㸐人的滿叔，忽然間像發癱風無停動，手還擎等對電視的方向怨怪，單淨半側屎胐慢慢翹起來。我知，他表情硬鉸是禁氣、用力挶屁卵，續下來他有影伸手去屎胐空捉。我摎姑姑看著，萬般耐毋得，喉嗹強強𪹚出了笑聲。續等，他摎空拳肚的屁卵用鼻公輕輕仔㗱，測量毒氣醹度，開聲啐啐滾的滿意，所謂毒蛇毋會死在自家毒液就是恁樣，然後他出招，三步走兼到電視面前，摎手上「九死瘴氣散」撳下去，該臺總是一摸著就故障的電視，螢幕堵好烏忒，楚留香也消忒，勝利的滿叔挑事笑到風神，出聲打爛盎，比鬼叫還較慘死。姑姑這下笑了，挑事的，開聲怪異的笑響，像鬼聲。「鬼仔。」滿叔聽著頂高有聲，喊：「下來輸贏。」我撳等姑姑的嘴，愛她恬恬。阿公嗄挑事撓她，分她緊笑，用這種方式去翕下背的滿叔。滿叔譴到蹦飆，探頭緊罵，罵到舌嫲會必開，這是因為聽講堵著鬼仔愛用盡毒腸的話罵轉去，他相信這種講法。我講過了，桁桷恁烏，底下的人絕對看毋著我們，故所滿叔繼續罵，面紅濟炸的樣仔分姑姑看了笑到會貶肚笥。忽然間，滿叔恬嘴，拿等拖鞋，用力攉往上打鬼仔，分頂項的阿公穩穩接著。滿叔等了當久，無看著鞋跌下來，左行兩步，右徙三步，無成東西分鬼仔拿去著等了，他出力攉往上第二隻拖鞋，共樣消失了。包尾，阿公結束遊戲，摎兩隻拖鞋放忒。它們跌往下，準準跌在滿叔的面項。倘好笑了！姑姑大嫲聲笑，我乜是。第二章我們的手語是功夫，也是舞蹈，還較是啟智班的豪光姑姑摎我同庚，大我七日又六點鐘，堵好是一隻蟬仔的生命。我阿婆在五十歲停經以前有身了，堵好我姆乜大肚笥，兩子家娘共下有喜是地方佳話。頭那毛變白的阿婆較敗勢，準備退休的子宮，嗄分助生娘娘鬧一下，送來一隻等路，面對外人的眼光，她總是摎問題𢳪分她老公。「咖哩就是咖哩，一種治病食物。」阿公永遠恁樣講，「食多了，毋會得著倒陽。」「這正是發病的事。」阿婆講。我姆面對這件事較自然，她摸等肚笥裡背的我，總是講，原旦是送子鳥嗛等雙生子分她，毋過鳥仔來到屋家時，分咖哩味餳到口涎溚溚跌，鳥觜無銜緪，一個跌落來的嬰兒仔分她家娘接著。阿婆講她無恁大神氣降人了，恁老了，肚笥還分人搣，又摎問題𢳪分她老公。「咖哩就是咖哩，一種治病食物。」阿公永遠恁樣講。「咖哩哪有治療你的病？硬殼無藥治。」阿婆反駁，「你恅著咖哩忒醹，敨酒食，嗄酒醉出問題了。」兩子家娘的肚笥漸漸大起來，分時光孵大的胚胎，我摎姑姑，來到世界的緣分開始顛倒算時。假使她在我的生命裡肚缺席，我會變做一儕無膽、驚生摎愛噭的細憨牯—無定著我早就有恁樣想法，我歇在阿姆肚笥時，她旅行離開我阿婆忒遠，我會蠕蠕，她轉屋後挨兼阿婆的肚笥，我會馴馴。這是阿姆講過的。我降出來時，噭到砰天砰地，是一隻來到新世界無帶著開關的噭眵牯，好在阿公揇等襁褓的姑姑來看我，還摎她放在我脣項。我笑咧！我摎姑姑搵到眠床項，像雙生子，像分棉被包塞塞的麵團在光陰裡肚發酵變大，開始體驗咖哩人生。咖哩是阿公對南洋做日本軍伕帶轉來的食物，漸漸代換我屋家傳統的草藥生理。咖哩醬，罔吮是無麼个道理，單淨食淨淨，認真品嘗，它正會回敬你生命能源。在我摎姑姑每四點鐘就噭奶唶，在歸屋是火囪連續熇燥濕尿布的臭臊味，在人客入屋就跍下來撚兩嬰兒仔的脝乳頦腮，在大家各自舂頭磕額時，阿公單單做一件事情，有閒就㨮一盤咖哩，用手指搵醬，點在兩嬰兒仔嘴脣，打開我們對百般草藥的孔竅，講斷真的，姑姑目佛佛尋答案，為著一息息仔百味人生的開頭在思考，續下來她噭了，我這尾黏人蟲跈等噭到大嫲聲。我這生人當多事情是跈姑姑做，毋使選擇，做得減少踟踟躕躕，包括決定我們兩儕命運的嚴重感冒。過忒對歲，姑姑先感冒，歸夜噭到發狂，還遰分我，變到兩隻大喇叭在老屋轟天轟地。我摎姑姑在續下來的幾日仔，鼻水濫泔，面紅濟炸像電球仔，又噭又翻，日夜發揮喉嗹的盡大功能，然後照程序做忒治療行程，用的藥性越來越緪，漢藥湯、西藥摎注射，接等拜桁桷的鬼魂，拜就近的宮廟，背尾拜了屋家人盡信的法雲寺菩薩，人正好。我破病正好，歸日搵到眠床項，頭那暈暈，像裡肚有老虎貶來貶去捉背囊的蝨嫲，就在該下，我記得所有發生的一空一缺，鼻公先醒了，空氣中有淡淡香茅油味；續下來我耳公醒了，有隻慢板的皮球拍地聲，漸漸行過來，然後我目珠乜醒了，金金看著姑姑的面顛倒在我十公分的頂高，笑到堵堵好薄的菲蜜，用她盡尾擺清楚講出就罅我一生人受用的話，「來去曬日頭了。」然後她像寒天的溫暖日頭孵過來，唚我，力量大細堵好，我一下仔作劇貶䟘起來，跈她走出門搞，外背是天晴朗朗的日頭絲，光絲編織好勢一幅燦爛圖案，萬物亮線，在山水重疊的細縫，光影分明之處，有兩儕細人仔笑連連。該是過年時節，哪都是歡樂氣氛，在盡遠的天空有飛行機雲，鳴炮聲在山脈之間晃晃激激，滿叔在天墀坪打紙炮，拿香點著就走，爆炸聲摎火藥的臭火味分我又驚又好，又囥又兼。正十歲的滿叔當遽發現他一歲的老妹非常傀奇，紙炮聲無嚇著她，還蹀蹀行兼去，毋驚死的樣仔。滿叔摎她揇起來，問了幾句話乜無得著她應，甚至在她耳公脣大嫲聲喊都無用，遽遽帶去分大人看。大人圍等姑姑，人圈箍緪緪，問話一句比一句還較利，嚇到姑姑噭了，我也跈等噭到大嫲聲了。續下來一隻月，姑姑在醫院間流動，包尾確定，她耳聾了。我摎姑姑，人生必開來的岔路出現了。

個人命運與時代交鋒社會觀察家細膩筆觸資深媒體人李旺台，回頭用母語，生動活跳地寫出童年記憶和當代故事。全本書有分人不盼得个情思，也有諷刺今下社會現象个鋒利。有趣又細膩个語言，客語濃度百分百，卻又能輕鬆閱讀。日本時代某天，李勤英一家搬到屏東市的宿舍，家中大庭園成為三姊妹遊玩的場所，園中有兩棵芒果樹。春夏交至時分，芒果的酸甜滋味讓人忍不住流口水。那是全家人最幸福的時光。日本時代某日，李勤英規家人搬到屏東市个宿舍，屋下大庭園係三姊妹遊玩个所在，屋背有兩棵番檨樹。春夏交至時節，番檨个香甜味緒分人忍不住漏口水。那是全家人最幸福个時間。十篇有聲个客語小說辭典也尋不到个韻味五、六年過後，國民政府接收宿舍，無奈之下只能搬離。有一天，初中某位同學的作文刊登在佈告欄，篇名竟是「我家的芒果樹」！大姊和勤英兩人讀著讀著，那不就是從前家裡那兩棵樹嗎⋯⋯五、六年過後，國民政府將宿舍接收去吔，李家無勢奈何只好搬走。有一日，初中某位同學个作文刊登在佈告欄，篇名竟係「𠊎屋下个番檨樹」！大姊同勤英兩儕讀著該篇文章，該係頭擺仔𠊎等屋下个兩頭樹仔無⋯⋯——【本書特色】★客委會「客語文學作家創作計畫」七位強檔作家聯袂創作★美國Foreword雜誌獨立出版獎歷史小說類銅獎作家李旺台全新客語小說集★全書以超過60％的客語文字書寫，並附上詳盡華語註解，讓讀者輕鬆閱讀客家文學。——【作者】李旺台資深媒體人，作家。從職場退休後改寫長篇小說，已發表《獨角人王國》（春暉出版，二○一五）《播磨丸》（圓神出版，二○一六）《馬賽這一家》（鏡文學連載，二○一八）《蕉王吳振瑞》（鏡文學，二○二○）《小說徐傍興》（玉山社，二○二一）《快樂茶行》、《黑人》（遠景出版，二○二四）曾獲第六屆懷恩文學獎、新台灣和平基金會第一屆、第四屆、第五屆台灣歷史小說獎、二○一七台灣文學館台灣文學獎入圍，是目前頗受矚目的歷史小說家。二○二五年榮獲美國《Foreword雜誌》獨立出版•歷史小說銅獎、並入圍美國筆會文學獎。【客語協作】曾秋梅客語薪傳師，屏東六堆客語教師協會創會理事長，國立屏東教育大學客家文化研究所客語研究碩士。現任豐田國小、屏科實小客語教師，投入客語教學第一線20餘年。曾經參加全國語文競賽散文組第三名、客家筆會散文競賽第三名。——【內文試閱】〈𠊎屋下个番檨樹〉搬家後，𠊎係天下第一幸福个人，𠊎屋下係天下第一甜蜜个家庭。新屋在屏東市勝利路勇勝十五號，有一息舊又無麼舊个日本宿舍，厚厚个實木做个前門，漆大紅色，遠遠看啊去盡打眼醒目；𢱤開大門入去，一接眼个就係闊闊个草坪，圍牆脣種花花草草，來毋掣詳細欣賞，行幾步磚仔路，出現眼前就係橫推个紙門，紙係用細樹桷仔隔做一格一格，輕輕𢱤開，最先鼻著个係淡淡个希挪奇（ヒノキ）香味。𠊎最好鼻希挪奇个味緒，歸家人都盡好。搬入新屋後，𠊎不時毋多知吔會深深吔敨一下大氣，分該清新木質香氣敨入胸脯，走入腹肚；擺把吔半夜隔醒起來，貶身，順續吔鼻香，鼻著希挪奇香肚帶有花果香氣，又蓋像帶有一息樟腦味，吸入腦膈肚也吸入夢肚。吾屋下有五個人，爺哀同三個妹仔。𠊎座二，安到李勤英。屋下除吔最簡單个灶下煲煲缽缽同兩領被骨外，無眠床，無膨凳；好得新屋全部舖榻榻米，行動坐尞、食飯睡目都係在這榻榻米上，毋使趕緊去買，也無錢買。阿爸每日騎等一張有大後盤个古老腳踏車，載等各式布料，騎對大路項轉到有人家个庄頭、伙房、大耕作有口人家个禾埕肚賣布。做這種生理，阿爸一息都毋會感著自卑，經常同𠊎等姊妹講：「阿爸係だいどうしょうにん。」這係𠊎最早學著个日本話之一，佢个漢字係「大道商人」。到𠊎讀小學以後正知，原來日語个「大道商人」係街頭攤販个意思。𠊎等毋掣愛講屋下後背个庭園，大約半隻籃球場恁大，有兩頭盡高个番檨樹，樹身粗壯，葉仔生到蓋榮。兩頭合共下，像一支大遮仔，這係一行入屋仔後背就會感覺特別涼爽个原因啦！看詳細一息，樹皮烏烏，必痕必痕，還生到有一息斜斜，但無礙著佢等一等高大个樣仔。𠊎等搬入來歇个時節堵好係春天。每日朝晨，一大陣个鳥仔在樹頂上嘰嘰嘎嘎喊𠊎等䟘床，再共下唱歌仔分𠊎等聽，𠊎毋知係麼个鳥唱麼个歌吹麼个曲。一日，𠊎行去後背，企在樹底下，抬頭想欣賞鳥仔，卻看著歸樹仔纍纍墜墜青青个細番檨仔，大聲喊阿姆來看，佢緊講「哦哇！哦哇！」又講：「結到恁多！到熱天時節𠊎等歸家人食番檨會食到屙番檨屎吔。」「使得摘去菜市場賣呀！」𠊎講。「恁呢蓋好，加減幫墊家用。」後背園仔變成𠊎等三姊妹最登真个遊戲搞尞場所。屏東个春天還在半路毋曾煞，熱天就追上來吔。交春夏至，樹仔底下，味緒越濃越複雜了，體感係涼沁涼沁，漂浮在空氣中个，係大樹林裡背正有个香味，哦！還有一想著就會分人口涎水液液液液个青番檨个酸味。隨等涼涼个清風，拂過𠊎等个面項，入到𠊎等个鼻公空。𠊎等每日在樹頭下搞捉迷藏、跳索仔、跳格仔，跳上跌落。𠊎又愛搶快來講吾姆吔唷。在𠊎知人我時節就聽講，三妹出世時節，阿姆月肚仔經常一個人偷偷吔噭眵。該時節吾屋下還歇在田寮个茅寮屋仔，豬欄就在隔壁。每擺，豬仔噦噦噦噦个聲音一煞，茅寮屋肚就會傳出阿姆蓋無奈勢何个怨嘆聲：「唉！又係細妹仔！」下後阿姆就無再擐胎吔，𠊎等三姊妹，每日赤腳嫲踏著等短褲仔野上野下。無想著，𠊎等搬來這間日本宿舍無到半年，就看著阿姆个肚笥緊來緊凸出吔。三妹該時節已經四歲半，暗晡頭睡目時還會使妮做嬌黏等阿姆，耳公貼在阿姆凸起个肚笥；阿姆會輕輕吔摸等三妹个頭那毛，細細聲仔問：「有聽著無？阿姆肚笥肚个係老弟抑係老妹？」三妹精砉砉吔，總係恁呢回答：「係老弟，𠊎係一個『招弟妹』。」然後阿姆帶頓笑意，一種混合著期待同祈禱个微笑，安心睡落覺。幾隻月後，產婆來屋下，一陣躁亂，一陣喊叫，𠊎在屋背心肝緊哱，好在又恬靜下來吔，無一久，屋肚仔傳出一聲響亮个嬰兒仔噭聲。過了一下吔，產婆過來報告好消息：「係細倈仔，細倈仔，無毋著。」𠊎等三姊妹都跳起來，三妹蓋自傲个講：「𠊎正式係一個『招弟妹』。」「這間日本宿舍係『招弟屋』。」阿爸補充講加一句。連續幾下日，阿爸个嘴角在㖸，目眉毛在㖸，目珠也在㖸。後背番檨樹下，係阿姆餵乳渡老弟个好地方。細竹篾做个晃槓放在後背門口，曬尿布个竹篙吊在壁脣。阿姆乳水盡足，正出世个老弟食飽吔睡，睡飽吔食。𠊎掀開細眠帳看入去，嬰兒仔用肚笥敨氣，細肚笥一凹一鼓，同番檨樹下清甜个空氣一吸一敨，樹頂項鳥仔啁啁滾同蟲仔唧唧滾个合唱歌聲，老弟毋知有在聽無？細老弟像福老話講个「一暝大一寸」，無一久吔就會在樹頭下爬來爬去吔。𠊎等三姊妹也學啊盡會跋樹仔。大姊先行，第一擺跋上樹就有收穫，在第一個杈椏縫肚發現三隻日本銀角仔。佢興著著吔溜下來，交分阿姆。「這係裕仁皇太子訪問台灣个紀念錢幣呢！」阿姆托在手項，𥍉等銀光，手巴掌抌啊抌吔，重重吔，嘴項唸唸唸唸對自家講：「這怕係鈴木校長愛歸日本時節，添放核帶走个喺？」「阿姆想先去估價，看佢等還值錢無。」趕天還毋曾暗，阿姆同老弟交分大阿姊後就去街項，𠊎同三妹跈在後尾。𠊎等蓋遽行入銀樓。頭家娘詳細看該銀角仔，開始同阿姆講價。無一久，看樣仔蓋像講好勢吔，頭家娘都打開拖仔，愛算錢分阿姆哩，卻看著阿姆緊急煞車，拿轉銀角仔，轉頭歸屋下。阿姆在路項同𠊎等講：「這三隻日本銀角仔賣核後，做得去買兩斗米歸去。」「係哦！那做麼个頭到毋賣呢？」「賣毋賣，還係愛先問過若爸。」「希望阿爸會同意賣核。」𠊎講：「鈴木校長歸去日本吔，想送還佢也毋知愛送到哪。」「這間日本宿舍毋單淨係『招弟屋』，更加係『招財屋』呢！」三妹講。該暗晡食夜時節，阿爸心神在在吔表示：「同這三隻日本銀角仔放轉原來个地方，該係鈴木校長每日朝晨䟘床愛向『宮城遙拜』个信物。放等，就當做鈴木校長精神還在𠊎等屋下，同𠊎等共下。」𠊎講：「阿姆拿去銀樓仔問過吔，賣个錢做得換兩斗米歸來。」「無關係。阿爸今嘎賣布賺个錢，罅𠊎等歸家生活用。後背个番檨黃吔，毋係講妳等想摘去市場賣吓，該也係一筆收入。恁呢𠊎等屋下會緊來緊發。」「著。鈴木校長留分𠊎等个係『招財屋』。」又係三妹在講好話。鈴木校長同阿爸个緣分，頭擺仔識聽過，毋故還係無麼知厥意。這下，𠊎大吔，定著愛問出全部个來歷。「鈴木係阿爸在公學校高等科讀書時个校長。學校仔个工友，安到阿明，有一日無細義腳橫斷吔，做毋得來學校服務吔。𠊎个班導師同校長推薦𠊎用工讀生个名義接這個事頭，因為𠊎在學校成績蓋好，屋下又苦，故所分𠊎這個機會賺兜仔錢幫墊屋下。校長召見𠊎，該日仔開始試用。工友个事頭毋會苦，淨愛比別人過早一點鐘去到學校，過暗一點鐘歸屋；校園、辦公室打掃清淨，課間操同食晝時間就愛去煮燒茶、抺桌仔這兜雜事。兩個禮拜後，校長同𠊎講：『若事頭做到蓋好，做得正式任用你做工友：毋故，若工資，𠊎先愛發分著傷个阿明。佢愛畜家庭，又愛繳醫藥費，𠊎知厥情形後非常同情，而學校仔淨有一個工友个薪資預算，所以呢，你愛做一隻月純義務个工友，下隻月正開始算工資分你，也淨做得分你一半，另一半還係用來幫助阿明。在情義下，𠊎準備用這種方式幫助佢三隻月。恁呢你接受無？』」阿爸講到這，𠊎豬接杓講：「阿爸，該下仔你一多歲？」「正十三、四歲。」阿爸繼續講：「校長恁呢講，𠊎無考慮就接受吔。畢業後繼續留學校做工友，做到結婚，降下你等。幾年後局勢變吔，日本戰敗，所有日本官員必須歸去，鈴木校長盡惜𠊎，喊𠊎同歸家人搬過來，這宿舍就恁呢讓分𠊎等。」阿姆補充一句：「若爸辛苦又煞猛恁多年，正得著鈴木校長个痛惜，𠊎等正有機會有恁好个宿舍好歇。」現下歸家人在這間宿舍，安然自在又勤儉過生活。阿爸每日出庄賣布分人著靚靚；阿姆就在屋下家頭教尾順理有方、針頭線尾織繡在行、灶頭鑊尾光光張張，料理三餐；大姊帶三妹同屋前屋背掃到淨淨俐俐，屋肚一哪吔抺到反金；𠊎就負責洗歸家人換洗个衫褲。離屋下無盡遠个圳溝脣，在該洗衫褲个婦女當中，𠊎最細，用棍仔捶毋夠力，就用兩隻腳在衫褲上用力蹬用力踩，洗好後阿姆會來完成最後个工作—出力扭燥，再披在高高个竹篙項晒。日仔就在頭抬高高看番檨哪時變黃个期望中度過。無一久，𠊎等三姊妹正式扛等一大籃个黃番檨去菜市場賣。大出个時節早市賣一轉，臨暗又去黃昏市場賣一轉。記得該時節大姊正入小學，八歲；𠊎六歲；三妹正四歲零。黃番檨大約一個禮拜就無好賣吔。摘番檨煞尾个該一日，阿爸講，今晡日摘个莫愛賣吔，留下來𠊎等一家人定定吔食啦！該下晝，三姊妹腳蹬一張楯頭仔，輕輕一躍就跋上樹仔，腰仔上䌈等細布袋仔，像三隻細猴嫲仔在番檨樹个椏桍上鑽來鑽去尋最後个黃影，黃貢貢个、黃蠟个、半黃个、息把黃影个全部摘下來，摘著一粒就放在布袋肚。𠊎等客家人蓋慣習喊細妹仔「猴嫲」，毋係壞話。𠊎等三隻猴嫲手板蓋遽，毋使半點鐘就溜下樹仔，塞到歸布袋仔鼓鼓。正摘下个番檨蒂頭還會流出黏黏个番檨乳，雜等番檨果香、葉香、樹香，香滿一圓身。食飽夜，一家六個人圍等錫桶，錫桶裡背放等三隻猴嫲在高高个番檨樹項鑽來躘去摘下來个番檨。毋使用著水果刀，淨用手指公，剝弓蕉皮樣吔輕輕地剝皮，番檨肉係黃个，澢澢汀汀个番檨汁係黃个，鮮嫩鮮嫩个黃，大口大口咬落去，再用力吞落該汁，香甜還有息把酸味，酸甜酸甜，係世間一等个味緒。歸家人都無講話，淨頭犁犁吔煞力牯嘬、煞力牯嚼；無一久全部人都變做「金盆大嘴」，番檨汁膏到歸嘴脣。過吔半點鐘，番檨皮同番檨核堆到會半山高。蜂仔同烏蠅也恬恬吔飛來共下享受這場番檨大餐，佢等自由自在飛來飛去，無洗腳又企到番檨皮項吸汁，蜂仔在𠊎等身邊吭吭飛，屎缸烏蠅就緊食緊頷頭。擺把吔𠊎等淨用手巴掌清裁揮一揮，你無吵𠊎等，𠊎等就毋會逐你。拚淨哩，滿面膏到黏黏夾夾，嘴角、舌嫲同牙縫留等个香甜味緒，毋盼得總概吞落肚。𠊎先企䟘起來行行啊，打一個噎，對蛤蟆胲湧出一團甜蜜。二甜蜜个日仔過到蓋順心，毋多知吔五、六年過去吔。𠊎在勝利國小五年生時節，縣政府來吔一位官員，同𠊎等講這間日本宿舍今嘎係國有財產，𠊎等做毋得繼續佔等歇在這，限期愛徙走。𠊎屋下分人被安排去承租市公所新起个中央市場裡背一間店面，阿爸就在一樓做布店，店仔後背有一間細間仔，大約五坪吔，係飯廳兼客廳又兼書房；暗晡頭歸家人睡在布店頂項个樓棚裡背。阿爸體恤𠊎等一家人對該間日本宿舍，有深深个感情；對目前个歇个環境，蓋毋慣，就不時恁呢勸𠊎等：—雖然無日本宿舍好歇吔，市公所也起了中央市場分𠊎等開店，𠊎等應該愛心存感恩啊！—阿爸付毋出第一筆押金，政府又協調第一銀行低利貸款分𠊎等，這就盡好吔！—對日本宿舍到中央市場，𠊎等愛重新學習、適應，這係上天分𠊎等歸家人个一門人生課題。—妳等有想著無，阿爸對一個「大道商人」升級做「布店店頭家」，係𠊎等屋下大大升級吔。𠊎這個做妹仔个，對阿爸講个「布店店頭家」特別有感。頭擺仔，看慣吔阿爸每朝晨騎等腳踏車載滿滿个布料，食力箭出門；到暗吔正歸身汗歸屋。今嘎个阿爸每日著到整齊整齊，還結內固帶（ネクタイ），蓋體面啊！𠊎屋下个布店毋大，對朝晨到暗晡都有人客上門，阿爸同阿姆總係笑弛弛吔帶人客看布料，選花色。人客有兜對蓋遠來个耕田婦人家，有縣府大細官員个家眷，有出家師父，也有學校个先生或者班項同學个爺哀。阿姆總會泡好茶，放在桌項，不管生理有做成無，密密斟茶分人客食，人客不時會坐下來東西南北打一下嘴鼓。漸漸吔，𠊎屋下變到蓋鬧熱，𠊎對自家屋下開布店，產生盡大个光榮感。在𠊎等屋下，阿爸講麼个，屋下人都信釘釘吔；雖然中央市場裡背無再有希挪奇香氣同番檨个甜蜜，毋故生活共樣安然自在。